ҮАБЗ-ИЙН НАРИЙН БИЧГИЙН ДАРГА А.ГАНСҮХ ТЭРГҮҮТЭЙ ТӨЛӨӨЛӨГЧИД ОХУ-Д АЙЛЧИЛЖ БАЙНА

ОХУ-ын Аюулгүй байдлын зөвлөлийн Нарийн бичгийн дарга Н.П.Патрушевын урилгаар Монгол Улсын ҮАБЗ-ийн Нарийн бичгийн дарга А.Гансүх тэргүүтэй төлөөлөгчид ОХУ-д ажлын айлчлал хийж байна. 

Айлчлалын хүрээнд А.Гансүх, Н.П.Патрушев нар ганцаарчилсан уулзалт хийж, хоёр улсын аюулгүй байдлын асуудал эрхэлсэн байгууллагуудын зөвлөлдөх уулзалтыг зохион байгуулав. Зөвлөлдөх уулзалтаар талууд хоёр улсын аюулгүй байдлын хамтын ажиллагааны өнөөгийн байдлын талаар ярилцаж, аюулгүй байдал, батлан хамгаалах, хууль сахиулах чиглэлээр цаашид хамтарч ажиллах боломжуудын талаар санал солилцов. Мөн зөвлөгөөнд оролцсон хоёр талын зарим төлөөлөгч өөрсдийн хариуцсан салбарын хамтын ажиллагааны боломжуудын талаар илтгэл тавьж, тодорхой чиглэлээр хамтарч ажиллах санал дэвшүүлэв.

А.Гансүх, Н.П.Патрушев нар Монгол Улс, ОХУ нь уламжлалт сайн хөршийн харилцаа хөгжүүлж ирсэнийг тэмдэглээд хоёр улсын аюулгүй байдлын асуудал нь харилцан уялдаатай гэдэгтэй санал нийлж, олон улсын харилцаа, бүс нутгийн зарим асуудлаар харилцан бие биенээ дэмжихийн чухлыг онцлов.

 

МОНГОЛ УЛСЫН ҮАБЗ-ИЙН НАРИЙН БИЧГИЙН ДАРГА А.ГАНСҮХ БНСВУ-Д АЙЛЧИЛЖ БАЙНА

   

БНСВУ-ын Нийгмийн аюулгүй байдлын сайд То Ламын урилгаар Монгол Улсын Үндэсний Аюулгүй байдлын зөвлөлийн Нарийн бичгийн дарга А.Гансүх энэ сарын 2-4-ний өдрүүдэд Вьетнамд айлчилж байна. 

Айлчлалын хүрээнд, ҮАБЗ-ийн Нарийн бичгийн дарга А.Гансүх Вьетнамын Ерөнхийлөгч Чан Дай Куанг-д бараалхаж, НАБ-ын сайд То Ламтай албан ёсны хэлэлцээ хийлээ. 

Талууд хоёр улсын хооронд тогтоосон уламжлалт найрсаг харилцааны өнөөгийн хүрсэн түвшинд сэтгэл хангалуун байгаагаа илэрхийлж, цаашид улс төр, аюулгүй байдал, батлан хамгаалахын салбарт ойр дотно хамтын ажиллагааг хөгжүүлэхэд идэвх чармайлт гарган ажиллахаар санал нэгдэв.

МОНГОЛ УЛСЫН ЕРӨНХИЙЛӨГЧ Х.БАТТУЛГА УЛСЫН ИХ ХУРАЛД МЭДЭЭЛЭЛ ХИЙЛЭЭ

Монгол Улсын Ерөнхийлөгч Х.Баттулга Улсын Их Хурлын 2017 оны 12 дугаар сарын 15-ны өдрийн чуулганы нэгдсэн хуралдаанд оролцож, ҮАБ-ын үзэл баримтлалын 4.3.4-д заасны дагуу улс орны үндэсний аюулгүй байдлын асуудлаар мэдээлэл хийлээ. Ерөнхийлөгчийн мэдээллийг Улсын Их Хурлын чуулганы нэгдсэн хуралдаанаар хаалттай горимоор сонсож, мэдээлэлтэй холбогдуулан гишүүд асуулт асууж тодруулан, үг хэлж байр сууриа илэрхийлсэн байна.

МОНГОЛ УЛСЫН ЕРӨНХИЙЛӨГЧ, ҮАБЗ-ИЙН ТЭРГҮҮН Х.БАТТУЛГА ҮНДЭСНИЙ АЮУЛГҮЙ БАЙДЛЫГ ХАНГАХ ТУСГАЙЛСАН ЧИГ ҮҮРЭГТЭЙ БАЙГУУЛЛАГУУДЫН УДИРДЛАГУУДТАЙ УУЛЗАЛТ ХИЙВ

Монгол Улсын Ерөнхийлөгч, ҮАБЗ-ийн тэргүүн Х.Баттулга Үндэсний аюулгүй байдлыг хангах тусгайлсан чиг үүрэг бүхий байгууллагуудын тэргүүн нартай өнөөдөр уулзаж, Монгол Улсын үндэсний аюулгүй байдалтай  холбоотой нөхцөл байдлын талаар мэдээлэл хийж, санал солилцлоо.

Уулзалт өнөөдөр үүсээд буй зарим нөхцөл байдалд үнэлэлт өгөх зорилготой юм. Уг уулзалтад ҮАБЗ-ийн Нарийн бичгийн дарга А.Гансүх, Ерөнхийлөгчийн Тамгын газрын дарга З.Энхболд, Батлан хамгаалахын сайд Н.Энхболд, Хууль зүй, дотоод хэргийн сайд Ц.Нямдорж, Гадаад харилцааны сайд Д.Цогтбаатар, ЗХЖШ-ын дарга Д.Даваа, ТЕГ-ын дарга Д.Гэрэл, ХХЕГ, ЦЕГ, ОБЕГ, Татварын ерөнхий газар, Гаалийн ерөнхий газар, ШШГЕГ болон Үндэсний аюулгүй байдлыг хангах тусгайлсан чиг үүрэг бүхий байгууллагуудын тэргүүн нар оролцов.

 

ҮАБЗ-ИЙН НАРИЙН БИЧГИЙН ДАРГА А.ГАНСҮХ СТРАТЕГИЙН СУДАЛГААНЫ ХҮРЭЭЛЭНД АЖИЛЛАВ

Үндэсний аюулгүй байдлын зөвлөлийн Нарийн бичгийн дарга А.Гансүх, Ажлын албаны дарга Д.Даваа-Очир нар тус зөвлөлийн дэргэдэх Стратегийн судалгааны хүрээлэнд ажиллав. Нарийн бичгийн дарга А.Гансүх ССХ-ийн хамт олонтой танилцаж, Монгол Улсын үндэсний аюулгүй байдалд тулгамдсан асуудлуудыг шийдвэрлэхэд дэмжлэг үзүүлэх стратегийн судалгаа, дүн шинжилгээний талаар уулзалт хийв.

ҮАБЗ-ийн дэргэдэх Стратегийн судалгааны хүрээлэн нь олон улсын аюулгүй байдлын нөхцөл байдал ба Монгол Улсын үндэсний аюулгүй байдал, хөгжил дэвшил, аюулгүй байдлын стратегийн чиг хандлага, үндэсний аюулгүй байдалд нөлөөлж буй гадаад, дотоод хүчин зүйлс болон ҮАБЗ-ийн хурлаар хэлэлцэгдэх асуудлуудтай холбоотой судалгааг гүйцэтгэдэг билээ.